Արամ.

Հարգելի հաշվապահներ, փոխվե՞լ է արդյոք հաշվային պլանը: Եթե այո, որտե՞ղ գտնեմ նորը: Շնորհակալություն:

Աստղիկ.

Բարև ձեզ, հարգելի կոլեգաներ: Գիտեմ՝ որքան դժվար է այժմ օգնել ուրիշին, երբ սեփական գործերին ժամանակը չի բավականացնում, սակայն խնդրում եմ հնարավորության սահմաններում օգնել ինձ, քանի որ առաջին անգամ եմ հղիության նպաստ տալու:
1. Գումարը կազմում է 153 000 դրամ, ի՞նչ պահումներ եմ անելու:
2. Հաշվետվության մեջ ինչպե՞ս և ո՞ր տողերն եմ գրանցելու:

Նարինե.

Մենք բացել ենք 22 ք.մ. տարացք ունեցող խանութ, որը զբաղվում է պտուղ-բանջարեղենի վաճառքով: Խնդրում եմ ասեք, որտեղի՞ց կարող ենք իմանալ` միրգ-բանջարեղենից բացի ուրիշ ինչ կարող ենք վաճառել (հաց, մակարոնեղեն…): Եթե ոչ` ինչ փաստաթղթեր պետք է հավաքել: Եվ էլի մի հարց` ի՞նչ հաշվետվություն (եկամտահարկ, վիճ. ծառայություն…) պետք է հանձնել, եթե Ա/Ձ-ից բացի աշխատող չկա: Նախօրոք շնորհակալություն:

Նարինե.

Հարգելի հաշվապահներ, խնդրում եմ օգնել մի հարցում: Եթե ՊՈԱԿ-ը 2011թ ունեցել է ծառայութան մատուցում և ստացել 200000 դրամ, և այդ գումարը անմիջապես ծախսվել է որպես գործուղման ծախս, արդյո՞ք այդ 200000 դրամը պիտի ցույց տրվի շահութահարկի հաշվետվության մեջ, թե՞ ոչ: Շնորհակալություն:

Հայկ.

Հարգելի հաշվապահներ, եթե տնօրենը գնում է գործուղման արտերկիր, բայց գործուղման թերթիկը կնքող երկրորդ կողմ չկա, ես կարո՞ղ եմ միայն իմ կնիքով այն ձևակերպել որպես գործուղման ծախս: Կանխավ շնորհակալ եմ, օգնելու համար:

Mariell.

Հարգելիներս, խնդրում եմ պատասխանեք հետևյալ հարցին: Ունեմ համատեղությամբ աշխատողներ, որոնք հիմնական աշխատավայրից գնում են արձակուրդ, նույն ժամանակահատվածում ես էլ պիտի տրամադրեմ արձակուրդ: Արդյո՞ք պիտի կատարեմ արձակուրդայինի հաշվարկ, թե՞ հիմնական աշխատավայրից են ստանալու միայն:

Կանխավ շնորհակալություն:

Dina.

Բարև. Դրամարկղիս գիրքը լրացրել եմ, անցել է 20 օր, և ինձ ՀԴՄ կտրոն է բերել տնօրենը, որն անպայման պետք է ֆիքսված լիներ իմ ձեռքբերումների մեջ: Ինձ պետք է անպայման ունենալ այդ կտրոնը, քանի որ այն հիմք է մի շարք գործարքների որպես փաստաթուղթ: Ինչպե՞ս անեմ: Կարող է խնդիր առաջանալ, քանի որ այդ օրից հետո ես 14 գործարք էլ արել եմ դրամարկղով, ուղղում մտցնե՞մ: Թե՞ արդեն երկար ժամանակ անցել, ու դեն նետեմ այն:

Minas.

Ուշադիր եղեք ԱԱՀ-ի մասին 8-րդ հոդվածի 12 կետին: Ապրանքների ներքին շարժերի դեպքում անպայման լրացրեք ուղեկցող փաստաթղթեր, որտեղ նշված լինեն մանրածախ վաճառքի գները: Կոմիսիոն վաճառքի հարկային փաստաթղթավորումը փոփոխվել է, և դեռևս անհասկանալի է, թե ինչպես պետք է ձևակերպել վաճառքից հասույթը (նոր օրենքում հարկվող շրջանառություն է համարվում մատակարարված ապրանքի արժեքը):

Եվա.

Հաստատագրված վճարի սահմանային չափի ցուցանիշների մասին հայտարարությունում սպասարկման մակերեսը ինչպե՞ս գրել, եթե եռամսյակի յուրաքանչյուր ամիս ունեցել է տարբեր սպասարկման մակերես: Կանխավ շնորհակալություն:

Վահե.

Հարգելի հաշվապահներ, խնդրում եմ պատասխանեք հետևյալ հարցիս. եթե ընկերությունը գնել է անվադողեր և տեղադրել ընկերությանը պատկանող ավտոմեքենայի վրա, ի՞նչ փաստաթղթեր պետք է լրացնի կամ կազմի ընկերությունը (եթե կատարողական ակտ չկա), որպեսզի հիմնավորվի, որ տվյալ անվադողերը տեղադրվել են վերը նշված ավտոմեքենայի վրա:

Թեհմինա.

Բարև Ձեզ: Խնդրում եմ պատասխանել հետևյալ հարցին:
Կազմակերպությունը ունի 2 պահեստ որոնք միմիանցից գտնվում են որոշակի հեռավորության վրա: Առաջին պահեստից նյութերը պետք է տեղափոխել երկրորդ պահեստ: Ապրանքի տեղափոխման ժամանակ մեքենան անցնում է ճանապարհով, որը չի պատկանում տվյալ կազմակերպությանը: Կարիք կա՞ առաքման գրքում գրանցել, և ի՞նչ փաստաթուղթ պետք է լրացնել: Կանխավ շնորհակալություն:
Հարգանքներով, Թեհմինա:

David.

Կարո՞ղ եք հուշել` որտեղից գտնեմ նոր հողի հարկի և գույքահարկի հաշվարկման ձևաթղթերը: Շնորհակալ եմ:

Դավիթ Աատրյան.

ԱԱՀ վճարող չհանդիսացող ՍՊԸ-ն իրականացրել է ապրանքների կանխիկ գնումներ (առկա են ՀԴՄ կտրոններ) վաճառելու նպատակով: 2011թ. փետրվար ամսին ամիս այդ գնումների ընդհանուր արժեքը կազմել է 3.2 մլն դրամ:

Հարց. ասացեք խնդրեմ, շահութահարկի պարզեցված հաշվարկում որպես նվազեցվող ծախս ցույց է տալու 3.2 մլն, թե՞ 3.0 մլն դրամ:

Միայն “Դրամարկղային գործառնությունների մասին” օրենքում է սահմանափակումները, որ միանվագ կանխիկ գնումների ամսական չափը չպետք է գերազանցի 3.0 մլն դրամը, իսկ “շահութահարկի հրահանգում” դրա մասին խոսք չկա:

Աննա.

Բարև բոլորին: Խնդրում եմ, ստուգեք՝ արդյո՞ք ճիշտ եմ կատարել հաստատագրված վճարի հաշվարկը դեպի Լոռու մարզ բեռնափոխադրումներ իրականացնող ԱՁ-ի համար` 2000*1,5տ*1,4=4200 դրամ: Նախապես շնորհակալություն:

Liana.

Խնդրում եմ, եթե տեղյակ եք, պատասխանեք: ԱԱՀ-ով աշխատող կազմակերպությունը կոմիսիայի պայմանագրով ապրանք է տվել մեկ այլ կազմակերպության, որը պետք է հաշվետվություն տա վաճառքի վերաբերյալ և վճարի համապատասխանաբար վաճառված ապրանքի չափով: Արդյո՞ք ապրանք մատակարարողը պետք է վճարի ամբողջ ապրանքի համար ԱԱՀ առանց հաշվի առնելու արդեն վաճառվել է, թե ոչ, թե՞ պետք է վաճառվածի վերաբերյալ հաշվետվությունը ստանալուց հետո վճարի այդ մասով ԱԱՀ:

Robert Babayan.

Հարգելի հաշվապահ մասնագետներ, շնորհավոր Ձեր Սուրբ Ծնունդն ու Ամանորը: Խնդրում եմ Ձեր ճշգրիտ ցուցումը: Ես պատրաստվում եմ բացել ուսումնական կենտրոն, որը կազմակերպելու է լեզուների և տնտեսագիտական դասընթացներ: Ի՞նչ հարկատեսակներով է հարկվելու իմ ՍՊԸ-ն: Կանխավ շնորհակալություն:

Արմինե.

Հարգելի հաշվապահներ, հարցս վերաբերում է վիճակագրական վարչության տարեկան հաշվետվությանը: Անհատ ձեռներեցը զբաղվում է ծաղկի առևտրով: Վիճվարչությունը խմբավորել է պարենային և ոչ պարենային ապրանքներ, և ես չգիտեմ, թե որ խմբում ներառեմ ծաղիկը: Շնորհակալ կլինեմ, եթե օգնեք:

Մարատ.

Կարո՞ղ եք պատասխանել՝ տաքսի սերվիս բացելու համար ԱՁ գրանցվե՞լ, թե՞ ՍՊԸ: Ո՞րն է դրանց տարբերությունը, և ո՞րն է ձեռնտու: Շնորհակալություն:

Դավիթ Աատրյան.

Ալֆա ՍՊԸ-ն դուրս է գրել հարկային հաշիվ, ասենք 600.0 հազ.դրամ` ներառյալ ԱԱՀ, Բետա ՍՊԸ-ին: Մատակարարման ամսաթիվը 29.12.2011թ., իսկ դուրս գրման ամսաթիվը 09.01.2012թ.: Բետա ՍՊԸ-ն 600.0 հազ. դրամը վճարել է 10.01.2012թ.-ին: Երկուսն էլ ԱԱՀ վճարող են:

Հարց 1: Ալֆա ՍՊԸ-ն 2011թ. 4-րդ եռամսյակի ԱԱՀ-ի հաշվարկում ի նկատի է ունենում այդ հաշիվը` որպես հարկային պարտավորություն:

Հարց 2: Բետա ՍՊԸ-ն 2011թ. 4-րդ եռամսյակի ԱԱՀ-ի հաշվարկում ի նկատի է ունենում այդ հաշիվը` որպես հաշվանցման ենթակա հետաձգված ԱԱՀ:

Հարց 3: Ալֆա ՍՊԸ-ն շահութահարկի 2011թ. հաշվարկում ի նկատի է ունենում որպես եկամուտ 500.0 հազ. դրամը:

Հարց 4: Բետա ՍՊԸ-ն շահութահարկի 2011թ. հաշվարկում ի նկատի է ունենում որպես ծախս 500.0 հազ. դրամը:

Տեսեք, թե ինչ խնդիրներ է առաջացնում մի օրենքի փոփոխությունը: Ու՞մ է պետք երկու ամսաթիվ, էդ ի՞նչ պրոբլեմ է, որ օրենք են փոխում…

Կանխավ շնորհակալ եմ:

Քրիստինե.

Բարև Ձեզ, հարգելիներս: Շնորհավոր Ձեր Նոր Տարին և Սուրբ Ծնունդը: Խնդրում եմ ասեք, եթե շահույթահարկի հաշվարկը 2011 թվականի համար բացասական թիվ է ստացվում, ես կարող եմ այդպես էլ լրացնել և հանձնել հաշվարկը (հիմնարկը կես տարի գործունեություն չի ծավալել): Կանխավ շնորհակալություն:

Ինգա.

Խնդրում եմ օգնեք հետևայլ հարցում: Ընկերությունը 2011-ին ԱԱՀ վճարող է եղել համաձայն դիմումի, իսկ 2012-ին որոշել է դուրս գալ ԱԱՀ-ից: Արդյո՞ք կարիք կա հարկային տեսչությանը ինչ-որ ձևով տեղյակ պահել այդ մասին: Մեր հարկայինի մի աշխատակիցը ասում է` պետք է տեղեկանք գրեք, մյուսն ասում է` ոչ մի բանի կարիք էլ չկա: Մեկ էլ մի հարց ևս` արդյո՞ք գործունեության ինչ-որ սահմանափակում կարող է հետևել դրան: Կանխավ շնորհակալություն:

Համեստ.

Բարև բոլորին: Շնորհավորում եմ Նոր Տարի և Սուրբ Ծնունդ: Եթե չունեմ հաշվապահի կրթություն, սակայն արդեն 5 տարի է աշխատում եմ հաշվապահ և նույնիսկ տիրապետում եմ ՀԾ-ի համակարգին, ես կարո՞ղ եմ մասնակցել հաշվապահի որակավորման քննություններին: Եթե այո, ապա որտեղի՞ց կարող եմ տեղեկանալ` երբ են անցկացվում քննությունները և ինչ հարցեր են:

Լոսի.

Ի՞նչ իրավունքներ ունի աշխատողը և ինչպիսի՞ պատասխանատվություն է կրում գործատուն աշխատողին 3 ամիս ուշացումով գրանցելու, իսկ գրանցելուց հետո պայմանագրում աշխատավարձը 50 տոկոսով պակաս ցույց տալու համար: Նաև եթե աշխատանքից ազատվելու դեպքում գործատուն հրաժարվում է վերջնահաշվարկ կատարել ու նաև վերադարձնել աշխատողի աշխատանքային գրքույկը:

Սաթեն.

Խնդրում եմ օգնեք ինձ:
Մեր կազմակերպությունը գրանցված է ՀՀ-ում և ապրանքներ է ներմուծում ու արտահանում: Իրականացնում ենք ԱԱՀ-ից ազատված 15 հոդված և ԱԱՀ-ով հարկվող գործարքներ:
– Դա դասվու՞մ է արտաքին տնտեսական գործունեության դասին, թե՞ ոչ:
– Ներմուծման, ինչպես նաև արտահանման ժամանակ ո՞ր օրվա փոխարժեքը հիմք ընդունեմ

Մասնավորապես, Օրենքի 55-րդ հոդվածի 1-ին մասին համապատասխան` Կարդալ ավելին “Ո՞ր օրվա փոխարժեքները հիմք ընդունել” →

Վահագն.

Բարև ձեզ: Խնդրում եմ օգնել հասկանալ մի հարց: Եթե օտարերկրյա քաղաքացին ՀՀ-ում գրանցվում է որպես անհատ ձեռնարկատեր և ՀՀ-ում զբաղվում է մանրածախ առևտրով, այդ դեպքում նա ՀՀ-ում համարվում է ռեզիդե՞նտ, թե՞ ոչ ռեզիդենտ: Իմ կարծիքով նա կհամարվի ռեզիդենտ ՀՀ-ում գրանցման պահից սկսած: Չգիտեմ` ճիշտ եմ արդյոք, թե ոչ:

Ինգա.

Խնդրում եմ հուշեք` 31.12.2011 ո՞չ աշխատանքային օր է, եթե ընկերությունը աշխատում է շաբաթ օրերին էլ:

Դինա.

Բարև: Աշխատողներից մեկը մեզ մոտ աշխատել է 7, և մյուսը` 5 ամիս: Գիտեմ, որ արձակուրդ հասնում է 6 ամիս աշխատելուց հետո: Դեկտեմբերի 27-ից մինչև 2012թ. հունվարի 16-ը որոշել ենք չաշխատել: Կարո՞ղ եմ նրանց ուղարկել արձակուրդ, և ինչպիսի՞ ձևակերպումներ պետք է տրվեն: Աշխատանքը հնգօրյա է, և իմ հաշվարկով 7 ամսվա աշխատողը պետք է գնա 12 օր արձակուրդ, իսկ 5 ամսվա աշխատողին հասնում է 8 օրվա արձակուրդային: Կուզեմ իմանալ ձեր կարծիքը այս մասին:

Տաթևիկ.

Կարո՞ղ եք ինձ օգնել: Ինձ անհրաժեշտ է իմանալ, կարող եմ արդյոք արձակուրդ ձևակերպել աշխատողին, եթե իր աշխատանքային 6 ամիսը դեռ չի լրացել: Շնորհակալություն:

Anna.

Բարև Ձեզ: Ես մի հարց ունեմ: Շահութահարկի հաշվարկը լրացնելիս 6-րդ աղյուսակում Պարտավորությանների բաժնում 21-րդ տողում` “Ստացված վարկեր և փոխառություններ” – այդ տողում ես պե՞տք է նշեմ տնօրենից ստացված անտոկոս փոխառության գումարը: Շնորհակալություն:

ԱՆԻ.

Բարև բոլորին: Խնդրում եմ պատասխանեք հարցիս: Եթե աշխատողն աշխատում է մի հիմնարկում 01/10/2010-ից և չի գնացել արձակուրդ, իսկ 31/12/2011 ազատվելու է աշխատանքից, ինչպե՞ս հաշվեմ վերջնահաշվարկ: Աշխատավարձը 40000 դրամ է և 6 աշխատանքային օր: Խնդրում եմ մանրամասն գրեք: Նախապես շատ շնորհակալ եմ:

anushik.

Խնդրում եմ ասեք կոմիսիոն պայմանագրով վաճառքի կարգը: Ի՞նչ է պետք բացի պայմանագրից և ակտից: Կազմակերպությունը աշխատում է ԱԱՀ-ով:

Մարիամ.

Բարև Ձեզ: Աշխատողը վերջին անգամ արձակուրդ գնացել է 01-30.11.10թ.: Այժմ պետք է հաշվարկեմ արձակուրդային 01-23.12.11-ի համար 20 աշխատանքային օր: Աշխատավարձը 70000 դրամ է, 5 օրյա աշխատանքային գրաֆիկ է եղել մինչև 01.12.11թ: Պետք է 20՞ օր լինի արձակուրդը, թե՞ 24: Գրեք մասնրամասն խնդրում եմ արձակուրդայինի հաշվարկը և սոց-ի ու եկամտահարկի պահումները: Կանխավ շնորհակալ եմ:

AKVA.

Հարգելի հաշվապահներ, նախօրոք շնորհավորում եմ բոլորիս Նոր տարին: Ցանկանում եմ աշխատանքում և կյանքում միայն վերելքներ, առողջություն և սեր:

Կազմակերպության կողմից ֆիզ. անձին վճարված եկամուտների մասին տեղեկություններ տալու ժամանակ ֆիզ. անձանցից երբ գնում ենք արել կամ պայմանագրով վարձել ենք նրանց միայն բեռնափոխադրում անելու համար, նրանց նույնպես նշում ենք եկամտահարկի տարեկան տեղեկանքում, թե՞ միայն հիմնական աշխատողներին: Կարո՞ղ եմ օգտվել Եկամտահարկի մասին օրենքի 31-րդ հոդվածի 3-րդ կետից: Ինչքանով ես իմ կարդալուց հասկացա, չնայած յուրաքանչյուր աշխատողի վճարել եմ 380000 դրամ, որը գերազանցում է 250000դ, սակայն նրա հարկային գործակալ հանդիսանում եմ ես, կարծում եմ պետք չէ նրանց ներառել Հայտարարագրում:
Ձեր կարծիքը խնդրեմ: Եվ մի հարց էլ` արդեն կարո՞ղ ենք այդ տեղեկանքը ներկայացնել էլեկտրոնային տարբերակով:

Արման.

Կարելի՞ է արդյոք ՍՊԸ-ի եկամտահարկը և սոց. վճարը կանխիկ մուծել բանկում առանց հաշվեհամարին մուտք անելու և փոխանցելու, եթե գումարը չի գերազանցում 300 000 դրամը:

Վահե.

Արդյո՞ք կա որևէ պաշտոնական պարզաբանում Լեռնային Ղարաբաղում գրանցված ընկերության կողմից ներկայացված հաշիվ ապրանքագրերի` ՀՀ-ում կիրառման հետ կապված: Շնորհակալություն:

Ata.

Բարև ձեզ, հարգելի կոլեգաներ: Ես սկսնակ հաշվապահ եմ և հետևաբար խնդրում եմ օգնեք ինձ: Եթե հիմնադիրն ու տնօրենն է փոխվում (երկուսն էլ նույն մարդն է), ֆիզ. անձից տարածք է վարձակալել, իհարկե վարձակալության պայմանագրով, որը նոտարով կնքված է, այդ դեպքում պարտադի՞ր է, որպեսզի փոխվի պայմանագիրը, և տարբերություն կա՞ անհատույց օգտագործման է, թե վարձակալած: Եվ եթե պայմանագրի ժամկետը լրացել է, ինչպե՞ս պետք է վարվել: Կանխավ շատ շնորհակալ եմ:

Մարինե.

Հարգելի հաշվապահներ, իմ անունով բացվել է ԱՁ 2011թ փետրվար ամսին: Աշխատել է 2 ամիս և այլևս չի աշխատել: Աշխատացնող անձը քաղաքից բացակայում է և հրաժարվում է օգնելուց: Եվ քանի որ ԱՁ-ն իմ անունով է, ցանկանում եմ լուծարել և ազատվել ցանկացած հետագա պրոբլեմներից: ՀՏ-ում ասեցին, որ սոցապ պարտք կա կուտակված, և նաև գրանցված են 2 ամսվա ՀԴՄ-ի թվերը: Պետ. ռեգիստրում արդեն դադարեցրել եմ գործունեությունը: Սոցապ գումարը կփոխանցեմ հաշվեհամարին: Հաշվետվությունների հարցում եմ դժվարանում, ի՞նչ հաշվետվություն ներկայացնեմ, և արդյո՞ք բավական է ՀԴՄ-ի տվյալները ունենալը: Նաև վարձակալման վճարը գիտեմ:

Ata.

Հարգելի կոլեգաներ, հարցս հետևյալն է: ՍՊԸ-ն տարածք է վարձակալել ֆիզիկական անձից, կոմունալ վճարները մինչև օրս անվանափոխված չէ, այսինքն ֆիզ. անձի անունով է: Պե՞տք է արդյոք եկամտահարկի հաշվետվությունում վարձակալական վճարի 10 տոկոս հաշվարկել և վճարել բյուջե: Ինձ թվում է, որ պետք չէ, քանի որ ֆիզ. անձի անունով են կատարվում վճարումները, սակայն կասկածում եմ և խնդրում եմ օգնեք ինձ: Շատ շնորհակալ եմ:

Թեհմինա.

Հարգելի հաշվապահներ, խնդրում եմ պատասխանել իմ հարցին: Աշխատանքի եմ ընդունել աշխատողին օրենքով սահմանված կարգով: 3 ամիս անց ուղարկել եմ ֆիզ արձակուրդ, դեկրետային գումարը 100000 դր. է կազմել, վճարել եմ բոլոր հարկերը և պարտադիր վճարները: Խնդրում եմ պատասխանեք, ինչպե՞ս կարող են ապացուցել, որ տվյալ անձը չի աշխատել, եթե կա ընդունման հրաման, տաբել, վճարման ռեեստր, և հարկային պարտավորությունները կատարված են:

Liana.

Բարև Ձեզ: Խնդրում եմ պատասխանել իմ հարցին: Ուզում եմ մասնակցել հաշվապահական հաշվառման դասընթացներին: Նման դասընթացներ կազմակերպող ՍՊԸ-ներ կան, բայց ես չգիտեմ` այդ դասընթացներն ավարտելուց հետո իրավունք կունենամ աշխատել որպես հաշվապահ: Ի՞նչ թույլտվություն կամ մի գուցե լիցենզիա պետք է ունենա տվյալ ՍՊԸ-ն: Խնդրում եմ հարցս անպատասխան չթողնեք: Շատ շնորհակալ եմ:

Հելեն.

Հարգելի հաշվապահներ, խնդրում եմ ինձ շտապ օգնել հետևյալում. եթե հաշվարկել եմ արձակուրդային աշխատավարձ հունվար ամսվա համար, այն պետք է ներառվի դեկտեմբե՞ր ամսվա հաշվարկներում, թե՞ դեկտեմբերին պիտի գրանցվի իր աշխատավարձը, և հունվարին` հաշվարկված արձակուրդայինը: Ինչպե՞ս է կարգը:

Մարիաննա.

Բարև Ձեզ, կանխավ շնորհակալություն: Կազմակերպությունս աշխատում էր առանց ԱԱՀ, սակայն 2011 թվականի հունիս ամսին վճարել եմ լիցենզիայի համար 200 000 ՀՀ դրամ, որից հետո համարվել եմ ԱԱՀ վճարող, սակայն տարեվերջին տեղեկացա, որ լիցենզիայի համար այլևս վճար հարկավոր չէ: Խնդրում եմ պատասխանել` արդյո՞ք 2012 թվականի նորից կարող եմ աշխատել առանց ԱԱՀ-ի:

Մարիետա.

Բարև ձեզ, խնդրում եմ ինձ օգնել: Ես ուզում եմ հարսանյաց զգեստների սրահ բացել: Ինքս հանդիսանալով անհատ ձեռներեց` կարո՞ղ եմ արդյոք ինքս աշխատել իմ խանութում, եթե դժվար չէ` ասեք իմ քայլերը, ի՞նչ պետք է անեմ ես ԱՁ բացելու և օրինական աշխատելու համար:

Հայկ.

Հարգելի հաշվապահներ, ԱՁ-ն դրամարկղի գիրք չի վարում, այս դեպքում աշխատավարձի վճարումը կամ այլ ելքերը ի՞նչ փաստաթղթով կարող է կատարվել: Կանխավ շնորհակալություն:

Հեղինե.

Կարո՞ղ եք օգնել արձակուրդայինների հաշվարկման հարցում: Եթե 2012թ. հունվարի 09-20 ունենամ արձակուրդ, ինչպե՞ս է հաշվարկվելու հունվար ամսվա իմ աշխատավարձը: Այն հաշվարկվելու է 7՞ աշխատանքային օրվա համար, թե՞ 12 օրվա համար (միջին տարեկան դրույքաչափը 200 հազար դրամ է, և դրան համապատասխան վճարվելու են 09-20.2012 արձակուրդայինները):

Արման.

Հարգելի գործընկերներ, ի՞նչ կասեք “Կանխիկ գործառնությունների սահմանափակման մասին” ՀՀ օրենքի նախագծի վերաբերյալ: Արդյո՞ք այն գործելու է 2012թ. հունվարի 1-ից հետո: Եթե ունեք տեղեկություններ, խնդրում եմ արձագանքել:

Anya.

Սիրելի կոլեգաներ, խնդրում եմ օգնեք: Եթե աշխատողը դիմում է գրում, որ ցանկանում է տեղափոխվել նույն ընկերության մեջ այլ պաշտոնում աշխատելու, և տնօրենը մակագրում է, որ համաձայն է, ապա ծանուցման ժամկետներ պահելու կարիք կա՞, թե՞ ոչ, և համաձայնվելով կնքում են համաձայնագիր, որ պայմանագիրը շարադրվի նոր խմբագրությամբ, որովհետև շատ բան է փոխվում: Թե՞ ճիշտ կլինի գրել նոր համարով պայմանագիր, թե՞ համաձայնագրում գրել, որ աշխատողը տեղափոխվում է: Եվս մեկ հարց` համաձայնագիրն ու պայմանագիրը այս պարագայում բավարա՞ր են, թե՞ անհատական հրաման էլ պետք է կազմել:

Անի.

Բարև Ձեզ, հարգելի հաշվապահներ: Խնդրում եմ պատասխանել իմ այս հարցին: Ես աշխատում եմ պետական հիմնարկում 2011թ. դեկտեմբեր ամսից: Հիվանդության պատճառով բացակայել եմ 1 շաբաթ և ներկայացրել եմ բժշկից տեղեկանք բյուլետենի բացման համար: Հաշվապահը բյուլետենի աշխատավարձ հաշվարկելու համար պահանջում է նախորդ աշխատանքիս վայրից աշխատավարձիս չափը հաստատող տեղեկանք միջին աշխատավարձ հաշվարկելու համար: Հարց` ինչու՞ է անհրաժեշտ այդ տեղեկանքը, ի՞նչ կապ ունի այս կազմակերպությունը մյուսի հետ, և դրա բացակայության դեպքում ի՞նչ կարող է լինել: Կանխավ շնորհակալություն:

Մարինե.

Հարգելի մասնագետներ, անաշխատունակության նպաստը հաշվարկելիս անհրաժեշտ է բաժանել վճարված գումարները 12-ի: Եթե աշխատողը աշխատել է տվյալ գործատուի մոտ 12 ամսից պակաս, ապա վարձու աշխատողը ներկայացնում է տեղեկություն նախորդ գործատուի մոտ աշխատելու եկամուտների վերաբերյալ: Ինչպե՞ս հաշվարկել անաշխատունակության նպաստը, եթե տվյալ գործատուի մոտ աշխատողը աշխատել է 12 ամսից պակաս, և տեղեկություններ չեն ներկայացվել մեկ ուրիշ գործատուի մոտ ստացված եկամուտների վերաբերյալ: Օրինակ, եթե աշխատողը աշխատել է 9 ամիս, բայց մենք բաժանենք 12-ի ընդհանուր եկամուտների գումարը, ապա աշխատողը տուժում է: Կանխավ շնորհակալություն:

astxik.

Բարև ձեզ, հարգելի հաշվապահներ: Հարցս ԱԱՀ-ի տեղեկությունների ներկայացման հաշվետվությանն է վերաբերում: Ստացել եմ ծանուցագիր էլեկտրոնային, սակայն ոչինչ չի բռնում: Ինչպե՞ս էլեկտրոնային եղանակով բացատրագիր գրեմ: Նաև անվավեր հարկային հաշիվների մասին բացատրագիրը հաշվետվությա՞ն վրա է պետք գրել, թե՞ առանձին: Եթե առանձին, սա նույնպես չգիտեմ` ինչպես: Խոսքս միայն էլեկտրոնային եղանակով ուղարկելու մասին է: Ննախապես շնորհակալություն: