Ընկերությունը լուծարման գործընթացում է

Բարև Ձեզ, կից ներկայացնում եմ ՊԵԿ-ի դիրքորոշումը նմանատիպ հարցի վերաբերյալ՝ Հիմք ընդունելով ՀՀ հարկային օրենսգրքի 35-րդ հոդվածի 1-ին մասը և 307-րդ հոդվածը, իրազեկման կարգով հայտնում ենք հետևյալը: ՀՀ հարկային օրենսգրքի – 143-րդ հոդվածի համաձայն ֆիզիկական անձի համար եկամտային հարկով հարկ­ման բազա է համարվում հարկվող եկա­մու­տը, որը որոշվում է որպես օրենսգրքի 141-րդ հոդ­վա­ծով սահմանված համախառն եկամտի և օրենսգրքի 147-րդ հոդվածով սահմանված նվա­զեց­վող եկամուտների դրական տարբերություն, – 147-րդ հոդվածի 1-ին մասի 36-րդ կետի համաձայն եկամտային հարկով հարկ­ման բազան որոշելու նպատակով նվազեցվող եկամուտներ են համարվում արժեթղ­թերից ստացվող եկամուտները՝ օրենսգրքի 149-րդ հոդվածի համաձայն, որի 1-ին մասի 2-րդ կետի համաձայն նույն հոդվածով այլ բան սահմանված չլինելու դեպքում եկամտային հարկով հարկման բազան որոշելու նպատակով նվազեցվող եկամուտներ են համարվում կազմա­կերպութ­յան կանո­նադրա­կան կամ բաժնեհավաք կապիտալում մասնակ­ցության (բաժնե­տոմսի, բաժնեմասի, փայաբաժնի) կամ ներդրում վկայող այլ արժեթղթերի օտարումից, այլ արժեթղթերի հետ փոխանակումից կամ նման այլ գործարքներից ստացվող եկամուտը: Նույն հոդվածի 2-րդ մասի 3-րդ և 4-րդ կետերին համապատասխան եկամտային հարկով հարկման բազան որոշելու նպատակով նույն հոդվածի 1-ին մասով սահման­ված եկամուտները չեն համարվում նվազեցվող եկամուտ­ներ (չեն նվազեցվում համախառն եկամտից), եթե 1) ստացվում են կազմակերպության կանոնադրական կամ բաժնեհավաք կապի­­տա­­լում շենքի, բնակարանի, առանձնատան կամ այլ շինության (այդ թվում անա­վարտ (կիսակառույց) ձևով մասնակցության (բաժնետոմսի, բաժնեմասի, փայա­բաժնի) կամ ներդրում վկայող այլ արժեթղթերի օտարումից, եթե այդ օտարումը կատարվում է կանո­նադրական կամ բաժնեհավաք կապիտալում այդ մասնակցութ­յունը (բաժնե­տոմսը, բաժնեմասը, փայաբաժինը) ձեռք բերելու օրը ներառող հարկային տարվա կամ դրան հաջորդող երեք հարկային տարիների ընթացքում, 2) ստացվում են որպես շահաբաժին, – 152-րդ հոդվածի 1-ին մասի համաձայն՝ ֆիզիկական անձանց եկա­մուտ­ների մասով եկամտա­յին հարկը հաշվարկում և պահում է հարկային գործա­կա­լը՝ հիմք ընդու­նելով օրենս­գր­քի 150-րդ հոդվածով սահմանված դրույքաչա­փերը, եթե օրենսգրքի 153-րդ հոդվածով այլ բան սահմանված չէ, – 269-րդ հոդվածով սահմանված են n միկրոձեռնարկատիրության սուբյեկտների կողմից հարկերի և վճարների հաշվարկման և վճարման դրույթները։ Հաշվի առնելով վերոնշյալ կարգավորումները՝ հայտնում ենք, որ․ բաժնեմասի օտարման դիմաց ստացվող եկամուտների մասով եկամտային հարկի պարտավորութ­յուն չի առաջանում, եթե դրանք կապված չեն օրենսգրքի 149-րդ հոդվածի 2-րդ մասի 3-րդ կետով սահմանված մասնակցության նույն կետում սահման­ված ժամկետներում օտարման հետ, – լուծար­վող ՍՊԸ-ի մնացորդային գույքի գու­մար­ի և ֆիզիկական անձի (տվյալ դեպքում մասնակցի) բաժնեմասի արժեքի միջև դրական տարբերություն առաջանալու դեպքում, այդ դրա­կան տարբերությունը ՀՀ հար­կային օրենսգրքով սահմանված չէ որպես նվազեցվող եկամուտ, հետևաբար ենթակա է հարկման եկամտային հարկով՝ օրենսգրքի 150-րդ հոդվածի 1-ին մասով սահմանված դրույքա­չա­փով, – շահաբաժինները ենթակա են հարկման եկամտային հարկով՝ օրենսգրքի 150-րդ հոդվածի 8-րդ մասով սահ­մանված դրույքաչափով, Միաժամանակ, տեղեկացնում ենք, որ՝ – բնամթերային (ոչ դրամական) ձևով արտա­հայտ­ված գործարքների ու գործառ­նութ­յունների շրջանակներում ձևավորվող հարկման բազա­ներն ու ակտիվների սկզբնա­կան արժեքները որոշվում են ՀՀ հար­կային օրենսգրքի 17-րդ հոդ­վածի 1-ին մասի համա­­պա­տասխան` ՀՀ կառավա­րության 09.03.2017թ. N241-Ն որոշ­մամբ սահմանած կարգով, – իրավաբանական անձանց լուծարման պետական գրանցումը հետ կապված կարգա­վորումները, ինչպես նաև լուծարման համար ներկայացվող փաստաթղթերը սահմանված են «Իրավաբանական անձանց պետական գրանցման, իրավաբանական անձանց առանձնաց­ված ստորաբաժանումների, հիմնարկների և անհատ ձեռնար­կա­տերերի պետական հաշվառման մասին» ՀՀ օրենքով, օրենսգրքի 307-րդ հոդվածի 4-րդ մասի 4-րդ կետին համապատասխան՝ հար­կային մարմինը դիմումի կամ դրա որևէ հարցի վերաբերյալ իրազեկում չի իրակա­նացնում, եթե դիմումը հետապնդում է հարկերի հաշվարկման կամ վճարման կոնկրետ դեպքերի սխալ կամ ճիշտ կատարման հավաստում ստանալու կամ հարկ վճարողի գործունեության և (կամ) փաստաթղթերի փորձաքննության անցկացման նպատակ: ՀԱՐԳԱՆՔՈՎ՝ Ա. ՄԱՆՈՒԿՅԱՆ